Vieiros

"O plan deberá estar dipoñible xa no primeiro semestre do ano que vén", avanzou Emilio Pérez Touriño na súa comparecencia no Parlamento galego, onde subliñou que o goberno estea xa en contacto cos axentes económicos e sociais para o deseño dun Plan Estratéxico que vire esta situación.

Touriño debullou as medidas básicas dese plan promovido desde a consellaría de Traballo, que inclúe xa o impulso da campaña publicitaria "Cumprindo a tempo gañamos todos. Por ti, por todos", co obxetivo de fomentar a "cultura da prevención". Ao tempo, deseñouse para o ámbito escolar a campaña bautizada "A prevención na escola", que busca acadar a implantación dos conceptos de seguridade e saúde laboral dende as aulas. Touriño anunciou tamén que se substituirá o actual Instituto Galego de Seguridade e Saúde Laboral, cualificado polo presidente coma "altamente ineficaz e inoperativo", e que os centros provinciais cos que conta se integrarán nun novo ente cunha nova metodoloxía de funcionamento.

O voceiro do BNG, Carlos Aymerich, destacara anteriormente a necesidade de que aos galegos se lles "garanta tamén un dereito fundamental dos traballadores como é o de ter un traballo seguro". Aymerich lembrou que deica novembro deste ano morreran en Galiza un total de 93 persoas en accidentes de traballo. Ao tempo, pediu unha "maior implicación na inspección de traballo" e criticou ao PP por non ter avanzado na colaboración co Ministerio Fiscal nesta materia reprochándolles que sobre a creación de fiscais especializados "até o de agora só houbera palabras".