Vieiros

Advertira o presidente saínte do PPdeG, Manuel Fraga, que se a palabra "nación" aparecía no discurso previo cara á apertura do diálogo entre os partidos, o seu partido non participaría no proceso de reforma estatutaria. Semella en todo caso que ese aviso non será efectivo unha vez que a nova dirección popular tome o mando do partido no congreso de xaneiro, e logo que o probábel sucesor, Alberto Núñez Feijoo, confirmase a vontade de diálogo do PPdeG durante o acto de conmemoración dos 25 anos do Parlamento galego, onde en diferentes graos, ese desafío abrollou no discurso de PSdeG e BNG.

"Unha vez aberto polo goberno bipartito o proceso de reforma do Estatuto, o PP de Galiza non vai defraudar a seus votantes e participará nel, en defensa dun proxecto galeguista, reformista e centrado na consecución de instrumentos axeitados para a solución dos problemas reais dos galegos", recolle o documento que os populares levarán ao Congreso. Ao respecto, o PPdeG subliña que a súa intención pasa pola "reforma" e non pola redacción dun novo estatuto que parta de cero.

Especialmente, no caso do posíbel marco de negociación bilateral de investimentos do Estado, o PPdeG está disposto a defender esa posibilidade para Galizaen función das concesións que os partidos cataláns consigan para Cataluña, fixándose só o límite no "respecto escrupuloso á Constitución e o marco vixente".

Alén disto, o documento subliña o poder negociador dun PPdeG que "é imprescindíbel para aprobar a reforma" toda vez que esta require das dúas terceiras partes dos votos do Parlamento. Á beira, unha triple crítica: no contorno estatal denuncian a "grave irresponsabilidade" da apertura simultánea do debate sobre "grandes cuestións que no pasado levaron ao enfrontamento", entre as que citan a relixión, a monarquía, financiamento autonómico ou modelo territorial do Estado. A nivel galego e sobre o proceso estatutario, cualifican de "incoherencia" a postura do PsdeG, especialmente pola referencia no acordo do bipartito ao "carácter nacional de Galiza", e definen coma "inconstitucional" o proxecto de Estatuto presentado polo BNG.