Vieiros

Bolivia podería ter o primeiro presidente indio da historia de confirmárense as enquisas que sinalan a Evo Morales, líder do Movemento Ao Socialismo, como vencedor nas eleccións que se celebrarán o vindeiro domingo. Morales enfróntase ao candidato da formación dereitista Poder Democrático e Social, Jorge "Tuto" Quiroga, que fora vicepresidente do país no goberno de Hugo Banzer. Evo Morales pechou a campaña electoral no departamento de Santa Cruz e apostou por acabar coas políticas de libre mercado e por converterse nun "pesadelo para os Estados Unidos". Quiroga, pola contra, considera que o seu opoñente "carece de capacidade de xestión" e "suporía un paso atrás para Bolivia". O IGADI dedicou a última edición da Guía Exterior á situación en Bolivia.