Vieiros

Feijóo negou que o regreso da catástrofe á actualidade informativa tres anos despois prexudique o PP, e de feito asegurou que "se queren falar do Prestige, o grupo parlamentario popular está a disposición do pleno do Parlamento".

"Queremos seguir falando do Prestige e do post Prestige e de cómo está Galiza hoxe, despois de que se comprometesen 12.000 millóns de euros", apuntou, en referencia ao Plan Galiza. Segundo o ex vicepresidente, existía un plan comprometido polo Goberno central e na actualidade "as infraestruturas non se están facendo e os investimentos non se están executando".

Ademais, o deputado popular instou o actual Executivo estatal do PSOE a que explique cal tería sido a súa postura no desenvolvemento da catástrofe. "A actuación da anterior administración foi a que foi. Simplemente gustaríame saber cal é a proposta desta Administración", reclamou, e preguntouse "que terían feito co barco nas situacións de navegabilidade e de temporal que había naquel momento".

Por último, subliñou que se cumpliron os principais obxectivos que se marcou o Executivo, que eran que non se producisen vítimas mortais tras a catástrofe e que cobrasen de maneira inmediata todos os afectados. "E que non se puxesen en risco os máis de 1.000 millóns de euros que imos percibir da Unión Europea, do Fidac e dos fondos que cobren estas cuestións", e que segundo el poden correr perigo agora.