Vieiros

Insistira Alberto Núñez Feijoo en que era necesario agardar á volta destes dous días de votación no PPdeG para comprobar as forzas coas que partía cada un dos precandidatos cara ao congreso de xaneiro. Esa peneira pono á cabeza da carreira sucesoria e en privilexio para afrontar o diálogo que agora se abre, logo de apañar unha clara maioría de compromisarios o mércores na provincia da Coruña e de superar ampliamente este xoves a Xosé Cuíña na provincia de Pontevedra e triplicando os votos do político do Deza na cidade de Vigo.

En Lugo Feijoo non presentara candidatura, e o triunfo de última hora da candidatura do presidente da Deputación, Francisco Cacharro, sobre a que elaborara Xosé Manuel Barreiro, amosa a debilidade deste último, trasladándolle o poder negociador cara a xaneiro ao propio Cacharro, que malia todo publicamente asegurou que eses votos avalaran a candidatura de Barreiro.

En Ourense Baltar viña poñendo distancias nos últimos tempos coa candidatura de Xosé Cuíña, a quen lle advertira que debía cando menos conseguir a metade dos compromisarios na provincia de Pontevedra para que os ourensáns se comprometeran definitivamente con el. O fracaso de Cuíña nesa loita afástao do liderado popular e, se cadra en previsión dese resultado, Baltar xa movera peza ás portas da votación consensuando unha lista única de 65 compromisarios que reunía a baltaristas con xente próxima a Feijoo.