Vieiros

Segundo Suárez Canal, o PPdeG actuou na convicción de que "canto máis atraso no rural máis doado condicionar o voto". O conselleiro do BNG reiterou que os populares prometeran cartos desde Agricultura para proxectos cuestionábeis desde o "ámbito agrogandeiro ou forestal" responsabilidade dese departamento, e na liña dos xa coñecidos exemplos dos accesos ao parador de Cambados, ou piscinas en varios concellos, ilustrou a denuncia coa mención de obras de abastecemento para tanatorios ou mesmo para o aparcamento de restaurantes, que o executivo anterior tratou de disfrazar con "eufemismos que esconden obras que non terían encaixe nas competencias e cometidos desta consellería".

As cifras detalladas polo conselleiro no Parlamento amosan que o Plan de Infraestruturas rurais dos populares destinaba o 91% dos fondos para concellos gobernados polo PPdeG, mentres que para os do PSdeG quedou o 4% e só un 1% para os gobernados polo BNG. Suárez Canal afirmou que este Plan "foi discrecional tanto na súa distribución orzamentaria como na elección de concellos" e engadiu que a maiores iso significou "unha deslealdade coa Federación Galega de Municipios, coa que se acordara un reparto para todos os concellos galegos que se modificou a posteriori".

O conselleiro defendeu que o actual equipo da consellaría de Medio Rural "precisaba proceder á suspensión deses acordos co obxectivo de rescatar os fondos para destinalos ás obras que pretendan a revalorización do rural e da súa base produtiva". Nesa liña, asegurou que o novo plan será rexido por "criterios prioritarios de interese agrario e forestal" e que acometerá tamén "aquelas obras de infraestruturas necesarias que estaban previstas no anterior".