Vieiros

O presidente da Fegamp e alcalde de Lalín, Xosé Crespo, amosou a súa satisfacción polo proxecto que o executivo autonómico vén de presentarlles, asegurando que recolle as inquedanzas principais achegadas desde as administracións municipais, moi especialmente no ámbito do financiamento, e de xeito significativo no que se refire aos pequenos concellos. Despois da xuntanza da súa comisión executiva, a Fegamp trasladou así o positivo xuízo desta proposta, que cualifican de "enorme avance" e anunciaron a elaboración dalgunhas suxerencias que lle trasladarán despois á Xunta e que agoiran pode facilitar a sinatura dun acordo definitivo a comezos do ano que vén.

En declaracións para a Radio Galega este martes, o presidente da Fegamp destacou que a proposta permitirá atender a "todo aquilo onde os concellos fan cometidos impropios", en referencia ao 30% de orzamentos que avalían estar destinando a tarefas que son competencia doutras administracións pero das que os concellos asomen o financiamento. "Permitirá compensar défices estruturais", gabou Crespo, lembrando que se trata dunha "reivindicación histórica" dos concellos galegos.

Crespo tamén comentou este luns a iniciativa da patronal eólica galega de recorrer as autorizacións dos chamados "parques eólicos singulares" concedidos para a explotación desde as propias administracións locais ás que lles supoñen importantes cifras de ingresos, que poden aproximarse aos 200 mil euros ao cabo dun ano. O presidente da Fegamp afirmou estar "moi negativamente sorprendido" pola acción da patronal eólica, lembrando a pequena cota que dese negocio están rabuñando os concellos e anunciou que pedirán entrevista co conselleiro de Industria para mediar no conflito.