Vieiros

Co premio "A Nosa Rede", os enxeñeiros de telecomunicacións queren recoñecer especialmente a proxectos ou traxectorias no sector que destaquen na achega de beneficios á sociedade en xeral. Baixo eses criterios, hai un ano que a Noite Galega das Telecomunicacións acollía a entrega do galardón a Vieiros, merecente na opinión de AETG e COETG "por representar unha aposta galega para a información en rede, sendo xa unha referencia para todos nós, con sensibilidade especial para todos os temas tecnolóxicos que centran o desenvolvemento do sector TIC en Galiza"

Desta volta, o galardón concédeselle á Compañía de Radio e Televisión de Galiza, que a xuízo dos enxeñeiros de telecomunicacións "desde a súa fundación ten contribuído, mediante a incorporación das novas tecnoloxías, a chegar a máis do 99% dos cidadáns galegos; á normalización lingüística do noso país e á cohesión do territorio, destacando especialmente: o alto compromiso coas TIC dentro da súa propia organización; o desenvolvemento de empresas galegas vinculadas ao sector TIC e o desenvolvemento dunha consolidada industria audiovisual en Galicia".

TIC a pé de porto
O sistema de trazabilidade dixitalizado introducido no Porto de Celeiro, trebello que lle fornece ao consumidor toda a información que lle permite coñecer o rastro que seguíu o peixe que vai consumir "desde o momento no que foi capturado ata o momento mesmo do seu consumo garantizando así o control e a seguridade alimentaria en toda a cadea de valor da pesca", foi escollido para o Premio á Mellor Aplicación TIC 2005.

O acto tamén acollerá a entrega do Premio Ingeniero Gerardo García Campos á Mellor Iniciativa Empresarial no Sector TIC, que lle correspondeu á empresa viguesa Optare Solutions S.L. Por "integrar nun mesmo proxecto a aposta pola innovación e o produto propio e a visión empresarial e de negocio; o fomento do emprego tecnolóxico e polo desenvolvemento de produtos de interese social e empresarial".

Ao tempo vaise aproveitar o acto para a sinatura do Convenio Cidades Dixitais que inclúe a Lugo e Vigo no proxecto que xa se desenvolve nos concellos das Pontes, Vilalba e A Estrada.

Recoñecemento para Xavier Alcalá
Pola súa "decisiva contribución ao desenvolvemento da profesión de enxeñeiro de telecomunicación na comunidade galega, destacando especialmente o seu labor nos ámbitos da docencia, da investigación, do xornalismo e da literatura, achegando o coñecemento das novas tecnoloxías ao conxunto da sociedade", a AETG e o COETG decidiron tamén o outorgamento do título "Enxeñeiro do Ano" a Xavier Alcalá. De paso, tamén acordaron que o director xeral de Caixa Galicia forme parte da lista de socios de honra, distinción que lle conceden entre outros polo

O Director Xeral de Caixa Galicia, José Luis Méndez López, pasa a engrosar no presente ano a lista dos Socios de Honra da AETG-COETG, distinción que premia as personalidades destacadas no

apoio e na promoción do sector TIC en Galicia. As Xuntas Directivas da AETG e do COETG valoraron como razóns determinantes deste recoñecemento o seu liderato en canto a: o alto compromiso coas tecnoloxías da Información e da Comunicación dentro da súa propia organización; a implicación do grupo corporativo de Caixa Galicia en empresas vinculadas ao sector TIC e o "desenvolvemento de novos servizos sociais con soporte tecnolóxico, a través da Obra Social de Caixa Galicia, como os programas Ciberaulas para maiores, Ciberalia ou Imaxinarte".