Vieiros

Para 2006 o goberno haberá de investir un millón de euros na retirada dos símbolos que os edificios de administracións varias aínda herdan da ditadura franquista. Unha emenda de Esquerda Verde aos orzamentos do Estado do ano que vén promoverá ese traballo. Malia todo, IU-ICV presentara outras catro emendas, que foron rexeitadas, e que pedían fixar unha cantidade de ata 30 millóns de euros para os gastos derivados das propostas da comisión interministerial creada no ministerio de Presidencia. Ao tempo, a formación liderada por Gaspar Llamazares pedira tamén que se destinasen dez millóns de euros para compensar ás persoas que sufriron dos chamados "batallóns disciplinarios de traballadores", dez millóns para actuacións varias na recuperación da memoria histórica republicana e seis millóns para reconverter o Valle de los Caídos nun centro de recuperación da memoria histórica.

Precisamente, o Valle de los Caídos é obxeto doutra polémica, xa que IU-ICV pedira autorización a Patrimonio para celebrar unha rolda de prensa neste lugar coma parte das súas propostas para a recuperación da memoria histórica e a acusación dos crimes da ditadura, permiso que lles foi negado, cando paradoxalmente a administración autorizou unha concentración de grupos da extrema dereita en defensa da memoria do ditador.

Contámoslles tamén que a recén creada, na Coruña, Comisión para a Recuperación da Memoria Histórica, convocou para este sábado 19 unha concentración diante do Pazo de Meirás para reclamarlle á familia de Francisco Franco que llo devolva aos coruñeses. "Pola devolución ao pobo", é o lema dunha convocatoria que subliña o interese cultural do lugar e a posibilidade de que se destine a usos socioculturais, entre os que xa propoñen a posíbel creación dun centro de estudo da recuperación da memoria da Coruña.