"Hai moitas dúbidas", dixo o presidente da Deputación de Lugo, o popular Francisco Cacharro, ao respecto do desmentido do candidato Alberto Núñez Feijoo sobre a súa presunta proximidade co ex ministro e ex conselleiro Xosé Manuel Romay Becaría. Sen aludir directamente a esa candidatura, Cacharro insinuou a existencia de presións a algúns compromisarios para forzar o seu apoio e advertiu que independentemente de quen asine os avais "logo cada un, en secreto, votará o que lle pareza". Sobre ese sistema falou López Veiga, reprochándolles aos outros candidatos que non teñan propostas claras e asegurando que o seu proxecto de reforma do funcionamento interno do partido para darlle o control ás bases inclúe que os militantes poidan escoller "directamente" os candidatos ás alcaldías e á propia presidencia do PP.