Vieiros

Co título non oficial de candidato preferido pola dirección do partido en Madrid, e coa beizón non explícita de Manuel Fraga pero o impulso da súa condición de ex vicepresidente primeiro e cabeza visíbel do PPdeG á beira do de Vilalba nas últimas eleccións autonómicas, ademais da súa condición de actual vicevoceiro no Parlamento, Alberto Núñez Feijoo brincará publicamente á carreira sucesoria esta semana.

A incerteza sobre a súa candidatura, a última en presentarse logo de Enrique López Veiga, Xosé Manuel Barreiro e Xosé Cuíña, tiña que ver tamén coa intención de Feijoo de dar o paso unha vez que tivese garantido un apoio significativo a nivel interno que o confirmase coma favorito no combate. Almorzos e merendas nos tapadillos populares, ademais do público apoio dos presidentes das deputacións da Coruña e Pontevedra, respectivamente Juan Juncal e Rafael Louzán, aceleraron agora a súa candidatura, agoirándolle bos apoios nas provincias que maior número de compromisarios suman.

Cuíña pon distancia con Fraga
Contámoslles de paso que o ex conselleiro Xosé Cuíña, na semana seguinte á presentación da súa candidatura, nas súas palabras para "refundar o partido", matizaba este mércores as súas palabras logo da referencia crítica que Manuel Fraga facía a esa intención de Cuíña durante a fin de semana. En entrevista na TVG, o ex conselleiro insistía en que "refundar" non significa "destruír" senón refacer e subliñaba que os únicos que poden mudar as súas intencións son "as bases do PPdeG".

Xosé Cuíña recoñecía ademais que logo de trece anos dun "vencello expecialmente bo" con Fraga, esa relación "truncouse". "Xa teño asumida esa situación", afirmou.