Vieiros

Aínda que os gobernos rioplatenses subliñen "as excelentes relacións que manteñen" e que regresen os Embaixadores ás súas respectivas Embaixadas, os comunicados que intercambiaron indican a non superación dos atrancos que preocupan pola instalación das fábricas de papel de ENCE e Botnia na localidade de Frei Bentos (Uruguai), emprazada na marxe oriental do río Uruguai, e consideradas contaminantes polos habitantes da marxe occidental (Gualeguaichú – Arxentina) e polas entidades ecoloxistas.

Busti falara pola radio local e afirmara que as autoridades uruguaias aceptaron algún "incentivo" pola construcción das fábricas. Usando a opinión de sociólogos, filólogos e politicólogos chegaron á conclusión que, no uso común, esa verba pode suxerir corrupción mais non foi esa a intención de ninguén senón subliñar o interese especial de cadaquén.

Na desculpa da Chancelería arxentina inclúense puntos adicionais que foron respondidos polo goberno uruguaio e que destaca o periódico LA NACION (Argentina)

Resumimos puntos e respostas:
Arxentina desexa continuar coa "defensa da calidade medio ambiental do río Uruguai. O goberno uruguaio contesta que asume o "seu inalienable dereito a preservar o medio ambiente e a calidade de vida". Primeiro intercambio fraternal.

A Chancelería arxentina di que o goberno uruguaio "non deu oportuno cumprimento ás estipulacións do Estatuto do Rio Uruguai" e pide a provisión urxente de información sobre os traballos realizados e o proxecto en totalidade. Uruguai contesta que o goberno de Kirchner "debe asesorarse sobre a información subministrada ós técnicos arxentinos" especialmente no tocante a procesos de fabricación e sobre os efluentes líquidos e gasosos. Unha labazada na faciana do irmán.

Os arxentinos solicitan que este conflicto non sexa utilizado para agraviar ás súas autoridades e pobo (Informacións sobre o Gobernador Busti na prensa uruguaia). O irmán uruguaio cala.

Arxentina solicita ás empresas interesadas que "detengan o proceso de instalación das fábricas ata que rematen os estudios solicitados". A resposta do goberno uruguaio foi ratificar que "continuará apoiando a instalación das fábricas". ¡Irmán! Ti tranquilo que eu sei o que teño que facer.

Os presidentes de Arxentina e Uruguai toparanse no IV Cumio das Américas que se desenvolverá na cidade balnearia de Mar del Plata, a 400 Km. de Bos Aires e máis de 700 Km. do obradoiro das empresas. ¿Un abrazo de irmáns no Cumio? Seguramente.