Vieiros

Os fondos da CRTVG, sen contar as transferencias da Xunta, son de 15,4 millóns de euros, mentres que a Compañía da Radio e Televisión catalá dispón de 157 millóns e a ETB vasca 48 millóns. Esta situación de desequilibrio patrimonial que presenta a CRTVG debe corrixirse, segundo o Consello de Contas coa aplicación de medidas urxentes por parte da Xunta. O informe sinala que "os fondos propios da sociedade seguen sendo negativos exercicio tras exercicio e iso a pesar das sucesivas ampliacións de capital realizadas desde 1999". A xestión do equipo dirixido por Francisco Campos provocou que mentres que os fondos propios se reduciron en 5 anos un 50%, o capital procedente da Xunta multiplicouse por 5.

Por outra parte, no ano 2002, o gasto en contratos de traballadores asinados con ETT’s ascendeu a un importe de 6.054.080 euros, cunha media de 63 empregados, que representan o 12 por cento do cadro de persoal. O Consello de Contas lembra que xa en anteriores informes manifestou que a vinculación de numerosos traballadores a través deste tipo de contratos, ademais de supor unha renuncia a un proceso selectivo que respecte os principios de igualdade, publicidade, mérito e capacidade, supón unha discriminación entre os empregados, uns fixos e outros temporais, con distinto convenio. Apunta o Consello que ó contratar a estes traballadores baixo o capítulo "outros traballos externos" estase a imputar o gasto a outro diferente ó de persoal, co que se elude o control orzamentario.

O informe sinala tamén que o anterior equipo directivo concentraba as compras da compañía nun pequeno número de provedores, de tal xeito que 22 deles (o 5,2% do total) acaparan até o 68% das licitacións de obras e servizos.