Vieiros

"A Xunta xa se puxo en contacto con Fomento e coa concesionaria para tentar buscarlle unha alternativa á peaxe", asegurou María Xosé Caride, conselleira de Política Territorial. Caride insistiu en que se cumprirá a promesa saída logo da xuntanza do presidente da Xunta co presidente do goberno español, onde se anunciou solución para a peaxe, que a conselleira asegurou que se presentará a comezos do próximo ano 2006. Co crecente volume de tráfico na autoestrada, Caride recoñeceu que en pouco tempo a vía amosará unha clara saturación na altura de Rande e agoirou que a alternativa non estará lista antes do 2010.

Por outro lado, a conselleira referiuse tamén ás autovís do Salnés, do Barbanza, Santiago-Brión, Carballo-Fisterra e de Ourense deica a fronteira portuguesa. "Haberá peaxe na sombra, pero vaino pagar a Xunta", comentou. María Xosé Caride referíase así ao que foi aberta polémica do anterior goberno do PPdeG con socialistas e nacionalistas. A daquela oposición reprochoulle aos populares tentar de xeito encuberto converter esas infraestruturas en treitos de peaxe, utilizando a fórmula de concesión. Agora, o bipartito confirma que non variará a escolla do anterior executivo e que esas vías se construirán con encargo a empresas concesionarias da súa execución a cambio de poderen explotalas.

Caride fixo estas explicacións durante a presentación dos orzamentos da consellaría de Política Territorial, Obras Públicas e Transportes. O departamento contará en 2006 cun total de 454 millóns de euros, unha suba do 12% respecto a 2005 e tres puntos por riba da media de incremento do orzamento xeral da Xunta.