Vieiros

En 31 milleiros de postos de traballo se fixou o goberno galego o obxetivo de crecemento para o ano que vén, o dobre das previsións de 2005 e unha décima por riba do obxetivo que o goberno español fixou para o conxunto do Estado. De cumprirse esa meta, a taxa de paro quedaría en Galiza un punto por baixo da actual. Por outro lado, e poucos días despois de que o Consello Económico e Social presentase balanzo da evolución da economía galega, desmentindo a avaliación dos sucesivos gobernos Fraga, que teimaban en que se estaba producindo unha converxencia coa media estatal, o optimismo do bipartito nese apartado pasa por agardar que o crecemento vaia ao mesmo ritmo que a media estatal.

Lembrámoslles que a suma do total destes orzamentos para 2006 chega aos 9.911,73 millóns de euros, un 9,04% máis ca en 2005. O bipartito quixo destacar ademais da suba dos investimentos de emprego, que chega ao 18,7% máis ca en 2005, os aumentos asignados para a I+D e a Sociedade da Información, un 39% máis ca o ano anterior, e o incremento do 13,7% en políticas sociais.

Na presentación destes números, o conselleiro de Economía e Facenda, Xosé Ramón Fernández Antonio, subliñou ademais o incremento do fondo de cooperación local, dun 16,8%, e o apartado destinado ao reequilibrio territorial, cun abano de investimentos para a mellora de servizos en áreas rurais de ata 150 millóns de euros.