Vieiros

Reducir as axudas financieiras que lle obrigan ao país receptor a contratar servizos do país donante, limitando as oportunidades locais e combinar o aumento de axuda ao desenvolvemento co apoio ás reformas lideradas por países receptores son recomendacións específicas da organización Transparency International para os países máis ricos. Para os máis pobres, recomendan reforzar a vontade política de adicar máis esforzos á loita á corrupción permitindo un maior acceso público ás informacións sobre orzamentos, ingresos e gastos.

Advirten en todo caso que factores de risco coma son o secretismo dos gobernos, influencia inaxeitada dos grupos de elite e financiamento político confuso, son exemplo de factores que lle afectan de igual modo a países ricos e pobres. Así, e de xeito xenérico, chaman á comunidade internacional a comprometerse coa ratificación e co seguemento da situación segundo os criterios da Convención da ONU Contra a Corrupción, a Convención Anti-Suborno da OCDE e as convencións rexionais da Unión Africana e da OEA.

Ao norte, os recantos menos corruptos do planeta
O ámbito europeo ofrece os mellores datos, con maioría de países nórdicos na lista de menos corruptos: Islandia, Finlandia, Dinamarca, Suecia, Noruega... Entre os dez primeiros clasificados acceden tamén Nova Celandia, Singapur e Australia.

"A corrupción é unha das maiores causas da pobreza e representa á vez unha barreira para combatela", avisou durante a presentación do informe 2005 Peter Eigen, presidente de Transparency International, "corrupción e pobreza aliméntase unha á outra e atrapan os pobos no círculo vicioso da miseria", denunciou. O colectivo internacional advirte que os Obxetivos do Milenio fixados pola ONU están sendo freados pola corrupción e que esta debe ser combatida para garantir o éxito dos plans de desenvolvemento.