Vieiros

O nacionalista Xosé Ramón Paz Antón manifestou a súa satisfacción porque fose o propio PP o que impulsase esta iniciativa e "apoie a difusión deste himno e a consideración de Galiza como nación" (en referencia á última estrofa do texto na que se inclúe a expresión "Nazón de Breogán"). O deputado do PSdeG, Francisco Cerviño preguntoulle ao PP, con certa retranca, "se aceptan ese concepto, o de nazón, non o de Breogán".

O autor da proposta, o "popular" Roberto Castro retrucoulles dicindo que o concepto, tal e como o usa Eduardo Pondal, "é ben distinto a como o entendemos hoxe" e que esta definición non entra dentro do actual marco constitucional. "Andan na regueifa de intentar cambiar a Constitución por un lado ou por abaixo", engadiu.

Con todo, o deputado do BNG, Paz Antón, "saudou" a iniciativa do PP e considerou ademais que "pode ser un bo comezo, como o de Casablanca, para unha relación nos vindeiros meses nos que imos comezar a reforma do Estatuto". Porén, os deputados nacionalistas e socialistas deixaron entrever que o transfondo da iniciativa do PP é enlear ás dúas forzas políticas do bipartito nunha nova polémica. De feito, Roberto Castro comezou a exposición de motivos da proposta lembrando que no acto de proclamación do novo presidente da Xunta na praza do Obradoiro só se interpretou a primeira parte do himno e non na súa integridade como establece a Lei de Símbolos de Galiza. Un feito que motivara a protesta do dirixente nacionalista Francisco Rodríguez". "Se con esta inicitiva queren introducir estelas no goberno bipartito, van pinchar en óso", sinalou Francisco Cerviño.