Vieiros

O Bloc Nacionalista del País Valencià, que coincide tamén con estas críticas pero non conta con representación no Congreso, fará ouvir as súas emendas a través dos deputados do BNG, CiU e PNB.

O debate comezou coas intervencións dos voceiros do PP e do PSOE nas Cortes valencianas, Serafín Castellano e Joan Ignasi Pla, que avogaron para que o Congreso acepte a trámite o proxecto de Estatuto en nome do parlamento autonómico.

Tamén a vicepresidenta primeira do goberno español, María Teresa Fernández de la Vega, defendeu o proxecto de reforma do Estatuto valenciano porque "se fixo con consenso e porque consagra a Comunidade Valenciana no seo dunha España unida nos límites da Constitución".

Malia o acordo previo entre o PP e o PSOE, un dos aspectos do texto que podería someterse a revisión é a chamada "cláusula Camps", unha disposición adicional que establece que calquera ampliación das competencias das Comunidades Autónomas que non esteas asumidas no Estatuto valenciano obrigará a promover as correspondentes iniciativas para que a comunidade as asuma. O PSOE xa advertiu que esta cláusula sobrepasa os límites da Constitución española.

O texto introduce tamén o recoñecemento de "nacionalidade histórica" para a Comunidade Valenciana, a capacidade de disolución das Cortes polo presidente do goberno autonómico e a creación do Sistema Tributario Valenciano.