Vieiros

Touriño engadiu que o novo goberno abriu "un periodo de análise, reflexión e revisión dos contidos e da utilización e da propia viabilidade da explotación" para "extraer o mellor e o maior partido". Sinalou que nos próximos meses levará a cabo unha serie de consultas que permitirar "revisar e establecer cal será a utilización, funcionalidade e destino dalgún dos edificios do complexo que están pendentes de realización", en referencia ao Teatro da Música e ao Teatro da Ópera.

A preocupación da Xunta, sinalou Touriño, é que o proxecto "teña unha unidade como tal e que a súa viabilidade futura estea garantida plenamente", para o que é necesario que "sexa un foco de atracción capaz de captar presenza continua, de ter vida e visitantes, e ser protagonista dunha cultura que ten que ser viva, aberta e plural".

Pola súa parte, a conselleira de Cultura, Ánxela Bugallo, destacou que o anterior goberno do PP adxudicou xa 274 millóns de euros en obras na Cidade da Cultura e anunciou que esta semana proporá unha "nova xestión" e presentará o relevo do actual xerente da Fundación, Ángel Currás. Bugallo sinalou que quedan pendentes de adxudicación 37 millóns de euros.

O orzamento inicial da Cidade da Cultura, proxectada pola Xunta de Fraga, era de 132.823.675 euros. As obras comezaron en 1999 e estaba previsto que remataran este mesmo ano de 2005. Agora, as últimas previsións apuntan a que o prazo se alongará até, como mínimo, o ano 2008.