Vieiros

"Cantas máis candidaturas se presenten será moito mellor, porque iso reflectirá a pluralidade e o debate", defendeu Xosé Manuel Barreiro. "E non se trata de que uns poidan ser mellores ca os outros. Todos somos iguais, malia que uns digan que levan boinas e outros, como de min dixeron, que levamos birrete". Nesa liña, Barreiro aseguroulle aos medios que non falou con ningún dos "teóricos candidatos" da posibilidade de arranxaren candidaturas conxuntas e amosouse a prol da pluralidade de candidatos con opción ao liderado no partido.

Recoñeceu aínda así que si podería ser posíbel a existencia de acordos antes do Congreso que o PPdeG celebrará na segunda semana de xaneiro, aínda que ao respecto insinuou que no seu propio caso era probábel que optase en solitario á presidencia dos populares galegos. Así, insistiu en que non houbo encontros nas últimas semanas co ex conselleiro Xosé Cuíña e negou tamén que se tivesen producido contactos persoais co presidente dos populares ourensáns, Xosé Luís Baltar.