"Non estou seguro que Xosé Cuíña vaia presentarse. Supoño que agora os catro candidatos posíbeis están facendo reconto dos apoios cos que contan antes de anunciar a presentación da súa candidatura". Así o afirmou este martes o presidente do PP ourensán, Xosé Luís Baltar, quen malia todo, insistiu en que o seu voto e o do sector do partido que lidera vai co ex conselleiro de Lalín no momento en que decida presentarse ao relevo de Manuel Fraga.
Baltar lembrou que o seu apoio a Xosé Cuíña estivo sempre ben claro, ca cando o político de Lalín era secretario xeral do PPdeG, e garantiulle o aval do seu voto na carreira pola sucesión de Manuel Fraga e o liderado dos populares galegos.
Ao respecto das dúbidas que insinuou ter sobre a posibilidade de que finalmente Xosé Cuíña decida competir con Alberto Núñez Feijoo, Xosé Manuel Barreiro e Enrique López Veiga, comentou que "a ninguén lle gusta perder e os que optan teñen que estar seguros das forzas que os apoian".
O líder dos populares ourensáns recoñeceu que no PPdeG hai xa movementos para tratar de chegar ao congreso da sucesión cun candidato de consenso, aínda que remitiu á próxima xuntanza do comité de dirección do partido para ampliar ao respecto. Aínda así, lembrou que o presidente do partido, Mariano Rajoy, reiteroulle que a dirección madrileña non vai impoñer un candidato.
Ao respecto, La Voz de Galicia asegura este mércores que ese congreso sucesorio se celebrará entre o 14 e 15 de xeneiro do próximo ano.