Vieiros

Fenómenos extremos, tanto as secas coma os asolagamentos, deixarán de ser excepción para convertérense en norma a medida que avance o século e os efectos do cambio climático se vaian notando máis a cada paso. Ao fío da vaga de incendios deste verán, desde o colectivo WWF/Adena advirten que se ben a maioría son provocados pola acción directa de incendiarios, "a voracidade do lume e a predisposición a transformárense en grandes incendios case imposíbeis de extinguir é propiciada polas elevadas temperaturas e a falta de precipitacións".

Heikki Willstedt, experto en cambio climático da asociación subliña ademais que alén do problema ecolóxico o planeta afronta "danos irreparábeis" na súa economía e que os gobernos deberan consensuar plans urxentes diante desta situación. Ao respecto, destaca que a revisión este ano da diretiva europea de Comercio de Emisións será unha excelente oportunidade de "impoñerlle maiores reduccións aos sectores que teñen unha maior responsabilidade e capacidade de loitar contra o cambio climático".