Vieiros

As declaracións da deputada Laura Seara asegurando que a intención de Quintana "era boa", pero que as axudas ás mulleres maltratadas xa estaban recollidas nas leis estatais son consideradas polo BNG como "un precedente moi negativo" e como a primeira oportunidade para aclarar co PSdeG a política de comunicación do novo goberno. Neste sentido, Carlos Aymerich mostrouse convencido de que as palabras de Seara se trataron de un "arrebato persoal" e "non responden a ningunha estratexia", aínda que esixiulle á dirección socialista unha "rectificación pública".

"Sorprendéronme moito as súas declaracións, pero tería que saber que as medidas propostas pola Lei Integral contra a Violencia de Xénero as teñen que xestionar as autonomías. Non entendo como a alguén lle pode molestar que se estableza un salario para as mulleres maltratadas", engadiu.

Aymerich comprometeuse, como portavoz do grupo parlamentario nacionalista, a que este tipo de matizacións "non sucedan nunca" con deputados do BNG. "Dígoo con toda claridade, porque as diferencias entre os dous grupos que conforman o goberno non as temos que resolver a través dos medios de comunicación". Tamén engadiu que, neste sentido, o bipartito "precisa discreción".