Vieiros

"Estados Unidos e outros países deben poñerlle fin á práctica da detención secreta. Esas condicións fomentan a tortura e os malos tratos", denuncia Sharon Critoph, investigadora de Amnistía Internacional que tivo a oportunidade de entrevistar a Salah Nasser Salim e a Muhammad Farah Ahmed Bashmilah, outro preso nas mesmas condicións, "tememos que o que nos contaron estes dous homes sexa só unha pequena parte dunha realidade moito maior que conforman os centros secretos de detención que os EEUU teñen por todo o mundo", laiouse.

Critoph advirte que "facer a alguén desaparecer sen saber por que nin por canto tempo é un crime tipificado no dereito internacional e unha experiencia pola que ninguén debera pasar". Amnistía denuncia que estados coma Xordania, Indonesia e Iemen veñen colaborando neste tipo de abusos aos dereitos humanos. "As autoridades estadounidenses deberan revelar a identidade das persoas que manteñen recluídas en secreto e o lugar onde se atopan e permitir a investigación internacional deses centros", piden. Amnistía e a Cruz Vermella documentaron cando menos a morte de 27 persoas retidas deste xeito e calculan que podería chegar a dez mil persoas a cifra de presos polos EEUU en todo o mundo neste tipo de condicións.