Vieiros

Malia a vontade desde o PP de quitarlle trascendencia ás reunións que se veñen celebrando estes días, incluído o tradicional xantar que os populares celebran este luns na localidade pontevedresa de Ribadumia, o proceso de sucesión de Manuel Fraga á fronte do PPdeG estará máis patente ca nunca. Será clave neste contexto a propia presencia do líder estatal do partido, Mariano Rajoy, logo da propia xuntanza que tivo o pasado venres con Fraga, e nun momento clave do partido. De feito, Rajoy afronta na axenda inmediata, unha xuntanza en Madrid o próximo 1 de setembro onde os populares deberan arranxar estratexia para o novo curso político e pechar as fendas e cambaleos dos últimos meses.

Nese sentido, a intención dende a dirección en Madrid do PP de lanzar a Alberto Núñez Feijoo coma líder do PPdeG para a era pos-Fraga, amarrando a súa escolla antes do próximo Congreso, semella ter fracasado. Os movementos a nivel interno das últimas semanas explicarían a vontade do propio Feijoo e de Barreiro de facilitar que se chegue ao Congreso sucesorio con todas as opcións abertas, sen pechar a posibilidade de que todo candidato poida presentarse, e reforzando no seu caso, o liderado que esa xuntanza lles poida outorgar no partido. Ao tempo, os ex vicepresidentes descartaban inicialmente a posibilidade de acordaren unha lista conxunta con suma de cadanseus apoios, explicitando de momento a súa vontade de competir polo liderado do partido.

Contámoslles de paso que o secretario xeral do PPdeG, Xesús Palmou, confirmaba nos micrófonos da Cadena Ser que deixará a secretaría xeral do partido logo dese congreso sucesorio.