Vieiros

Logo das máis de trece mil hectáreas queimadas no que vai de mes de agosto, sumando as peores cifras dos últimos veráns, o presidente da Xunta convocou unha xuntanza dos departamentos das administracións implicadas na loita contra o lume para a avaliación da situación, a posta en común e o seguemento, coordinación e deseño das accións futuras. Na reunión estarán ademais do propio conselleiro de Medio Rural, Alfredo Suárez Canal, o conselleiro de Presidencia, os directores xerais de Montes e Interior, o delegado do goberno, Manuel Ameijeiras, os subdelegados provinciais e o director de protección civil.

Ourense segue sendo a provincia máis afectada, e este luns mesmo tiveron que realizarse desaloxamentos nunha urbanización próxima á cidade. A última hora do luns permanecían activos dezanove lumes, cinco deles xa controlados e catro deles de gravidade máxima nos concellos de Avión, Entrimo, A Bola e Taboadela. En Pontevedra mantíñanse unha ducia de incendios activos, cinco deles tamén controlados e dous co nivel 1 de alerta, nos concellos de Pazos de Borbén e Ponteareas. Dous dos sete incendios na provincia da Coruña estaban contra as 19h do luns xa controlados, requirindo outro par de incendios o grao de alerta maior, nos concellos de Carnota, na zona do Pindo, e en Rianxo, no lugar de Tarragoña.

O conselleiro de Medio Rural, Alfredo Suárez Canal, insistía este luns, en declaracións á Cadena Ser, en que as características dos lumes, con varios focos simultáneos, e repetidos en días sucesivos nas mesmas zonas, indicaban a responsabilidade delictiva de pirómanos na maioría deles. Malia todo, insistiu en que o labor da consellaría se centra agora mesmo na extinción e que con posterioridade se estudará polo miúdo o que está acontecendo.

Por outra banda, contámoslles da queixa que desde Vigo facía o concelleiro de Seguridade da cidade olívica, Antonio Coello, sobre a presunta falta de apoio da Xunta na loita contra os lumes da área metropolitana viguesa. Segundo Coello, durante a fin de semana teríase posto de manifesto unha falta de medios na zona, tendo que sumarse os bombeiros da cidade ás peticións de axuda doutros concellos próximos. "Estivemos loitando sós", acusou o concelleiro vigués do PP, ao tempo que advertía de falta de coordinación desde o executivo autonómico e pedía un plan de emerxencia.