Vieiros

O novo responsábel de Innovación e Industria da Xunta, o nacionalista Fernando Blanco, subliñou que "é obriga do goberno galego promover un acordo social contra a sinistralidade laboral que evite e lle poña freo á perda de novas vidas". Nesa liña, o conselleiro prometeu que o executivo "traballará conxuntamente para poñerlle freo a esta situación, porque este é un problema que lle afecta a toda a sociedade". As necesarias melloras en materia de seguridade laboral están tamén na axenda conxunta que desde o próximo mes de setembro tratarán a consellaría de Traballo, sindicatos e patronal.

Ao fío, recordámoslles que o anterior executivo recibira as queixas das formacións sindicais polo presunto ocultamento das cifras reais de sinistralidade. Segundo CCOO e UXT, as mortes por causa laboral poderían ser "ata sete veces máis das que quedan oficialmente rexistradas". As formacións sindicais acusan tamén ás mutuas de accidentes laborais e enfermidades profesionais de enviarlle ao sistema público de saúde moitos accidentes de traballo camuflados coma enfermidades comúns, agochando a súa orixe laboral.

Lembrámoslles que a comezos do mes de agosto morreran xa 55 traballadores en Galiza, unha media de case dous traballadores por semana, cifras que dende a CIG se cualificaban de "graves". "Non é soportábel para este país o constante incremento de accidentes de traballo con resultado de morte", laiábase daquela o secretario xeral da CIG-Mar, logo de coñecerse a morte un mariñeiro en Porto do Son.