Edición xeral
Quintana di que "o benestar só é posíbel con políticas feitas dende Galiza e para Galiza"
"Máis autogoberno é máis benestar", defendeu o voceiro do Bloque no seu discurso. Anxo Quintana destacou así a necesidade dunha "norma básica para afrontar os retos que Galiza enfronta no século XXI" e lembrou que o contrato de goberno que acordaron PSdeG e BNG "asome esa prioridade, con propostas e prazos concretos". Ao tempo, lembrou a vontade de traballar pola "reparación da débeda que o Estado tén con Galiza".
"Acadaremos ser respectados como nación", asegurou o líder do BNG, "é hora de que Galiza exerza coma nación", insistiu, prometendo alentar o debate sobre o modelo de Estado e traballar pola introducción da "vía galega" nese diálogo. "Deixemos de ser espectadores e pasemos a ser protagonistas", pediu, a prol da conformación dun Estado "plurinacional, cooperativo, aberto e solidario".
Quintana advertiu que Galiza non pode renunciar a un novo Estatuto "por temor, conformismo ou comenencia" e subliñou que a reforma estatutaria "é chave dun futuro mellor para os galegos". Nese sentido criticou que se pretenda "confundir" aos cidadáns "negándolle a importancia que tén" a un novo Estatuto. Ao fío falou da capacidade de defender os intereses pesqueiros de Galiza, da posibilidade dunha planificación universitaria propia ou do futuro enerxético do país e preguntou "se iso non é falar dos problemas e ilusións dos galegos?".
O voceiro nacionalista convidou "especialmente ao PP" a ser "ambiciosos" e a afrontar o debate con "tolerancia" e vontade de "consenso", chamando a un pacto para mellorar a "calidade da democracia galega". "O novo estatuto é a grande oportunidade de modernización de Galiza", dixo, "para decidir sobre as causas que lles afectan e lles importan aos cidadáns".
O pagamento da "débeda do Estado con Galiza"
Anxo Quintana opinou que "o 19 de xuño os cidadáns galegos enterraron ese artefacto chamado Plan Galiza, apostando por outro modelo", e lembrou que o pacto do bipartito establece prazos e propostas para o inicio da negociación co goberno español "do défice estrutural galego" especialmente nos ámbitos da "educación, sanidade e infraestruturas".
Explicou que o nacionalismo traballará "dende o diálogo e con firmeza, sen demagoxia e sen inventar agravios, pero sen ceder un milímetro" pola satisfacción "da esencia das demandas de Galiza". Concluiu pedindo un pacto nacional que fixe "a postura do país para que a sociedade civil galega poida estar unida na reclamación do papel que lle corresponde dentro do Estado".
Ligazóns
- "Galiza pode deseñar o seu futuro por si mesma", di Quintana
- Quintana anuncia unha proposta para "regular" as atribucións dos gobernos en funci&
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto