Vieiros

Segundo The Times ese anuncio produciríase nun comunicado que se daría a coñecer ao longo deste mesmo xoves ou que, coma moito, sería adiado deica o venres. As fontes próximas á banda ás que o xornal di qter consultado terían subliñado a súa intención de faceren este anuncio no momento en que consideren que o seu impacto será máximo, e temen que a crise antiterrorista en Londres estes días poida escurecer a decisión.

Nas últimas horas, Martin McGuinnes, xefe negociador do Sinn Fein, considerado o brazo político do IRA, quen fora de feito un dos lideres destacados da organización armada, afirmou pouco antes de coller o avión para unha visita ao goberno estadounidense que o IRA semellaba "disposto a asumir grandes retos". Na mesma xornada, o primeiro ministro irlandés, Bertie Ahern, amosábase seguro de que o anuncio do IRA se produciría de xeito inminente e agoiraba que será un paso "que transformará enormemente o conflito".