Vieiros

"Hai mes e medio que os presidentes Néstor Kirchner e Tabaré Vázquez acordaron crear unha comisión binacional de especialistas, expertos e técnicos, tres por cada unha das partes, para avaliar o impacto ambiental do proxecto", lembrou o chanceler arxentino nos micrófonos da emisora La Red, recollidas este mércores pola prensa de Arxentina e Uruguai.

"Esa comisión, á que lle corresponde facer un estudo ambiental perdurábel, debería terse reunido hai dez días. Pero Uruguai levantouna unilateralmente", laiouse Bielsa, "nós entendemos que temos un mandato constitucional para preservar as condicións ecolóxicas". Na súa opinión "a posición de Uruguai é incomprensíbel", explicou, "non sei cal é o temor ou o problema. Porque se efectivamente as plantas non polucionan, que mellor que disipar a dúbida axiña?".

Dende Uruguai, o presidente Tabaré Vázquez asegurou que falarán co executivo Kirchner para "amosarlles a seriedade dos procedementos que se están levando adiante". "O que está en discusión é se se contamina ou non as augas do río Uruguai", precisou, "e todos os datos que temos están dispoñíbeis para quen os queira ver, incluída a visita do ministro de Vivenda a Finlandia para ver as plantas de procesamento de celulosa", explicou Vázquez, "Finlandia é o país que protexe máis o seu medio ambiente", comentou en referencia ao segundo dos proxectos aparte do de ENCE, que promove a empresa finlandesa Botnia, "aplicarán a mesma tecnoloxía que usan aló, polo que hai garantías de que a contaminación vai ser controlada".