Vieiros

"O lóxico sería que o novo goberno fose o encargado de tomar esta decisión", lembra Anxo Louzao, "non é razoábel que o goberno en funcións dea ese paso e deixe pechado coa patronal ese acordo deixando atado ao equipo da nova consellaría con esta política de feitos consumados".

A decisión prodúcese ademais nun momento onde na comunidade educativa viñan medrando as voces a prol dun cambio de políticas a este respecto. A propia federación de ensino da CIG entregara hai poucas semanas no rexistro da consellaría oito mil sinaturas, a maioría de mestres e pais, en apoio da campaña promovida co lema Unir as voces en defensa do ensino público.

O secretario nacional da CIG Ensino lembra que "a lóxica pedía esperar á constitución do novo goberno" e critica que a decisión inclúe tamén o ensino posobrigatorio e a educación Infantil. Neste sentido lembra que a súa formación vén insistindo en que no contorno das áreas metropolitanas de cidades coma Vigo e A Coruña existen centros públicos con capacidade de absorber alumnado mentres a Xunta segue privilexiando os centros concertados aínda aló onde non son necesarios ou mesmo promove ciclos formativos no privado que non se ofertan en centros públicos. As áreas de Santiago, Ferrol, Ourense son exemplo tamén de como o alumnado de Infantil e Primaria escolarizado en colexios privados está superando xa ao dos centros públicos.