Vieiros

Touriño e Quintana acordaron crear un mecanismo de coordinación das políticas lingüística e de medios de comunicación, independentemente dos departamentos aos que estean adscritas, segundo fontes nacionalistas citadas por Europa Press.

Deste xeito, o PSdeG e o BNG terán que consensuar os nomeamentos dos responsábeis destas áreas e do director xeral da CRTVG. Ademais, pactarán os criterios de política comunicativa da Xunta e a súa relación cos medios privados. As comisións negociadoras serán as que decidan esta tarde o "formato" que se utilizará para coordinar estes ámbitos.

O acordo farase público esta semana, antes de que o 27 de xullo comece no parlamento a sesión de investidura do novo presidente.