Vieiros

Na denuncia explicítase a existencia de probas de que a iniciativa do goberno en funcións está promovida "co exclusivo propósito de beneficiar a un conxunto de persoas de entre 1200 e 1800 afíns políticos, en prexuízo dos intereses públicos que están chamados a defender e en prexuízo dos caudais públicos. Tamén en inxusto e ilegal prexuízo correlativo do restante persoal funcionario". Engádese ademais que o tipo penal no que inciden estas conductas é o de prevaricación, atendendo á descrición que fai o código penal no seu artigo 404: "Á autoridade ou funcionario público que, a sabendas da súa inxustiza ditare unha resolución arbitraria nun asunto administrativo, castigaráselle coa pena de inhabilitación especial para emprego ou cargo público, por tempo de sete a dez anos".

Afrontan a denuncia diante da fiscalía presentada pola CIG o presidente da Xunta, Manuel Fraga, coma persoa que "solicitou no seu día o ditame do Consello Consultivo de Galiza sobre os indicados proxectos de modificación", Jaime Pita Varela, coma "persoa da que se pode deducir a activa participación nos feitos denunciados, promovendo dentro da consellaría de Presidencia as actuacións necesarias para o despacho deste expediente" e Pablo Figueroa Dorrego, "probábel autor dos proxectos moral e/ou intelectual" autoría que segundo precisa a CIG "con base documental mesmo afirma o Consello Consultivo no seu ditame".