Vieiros

Das 579 parroquias incluídas como zonas de especial risco de incendios, que representan o 15% das 3.794 existentes en Galiza, 116 sitúanse na provincia da Coruña (na que existen 939 parroquias); 42 en Lugo (1.267); 263 en Ourense (920) e 158 en Pontevedra (668).

Segundo se desprende do informe da Xunta, os traballos preventivos axeitados para as zonas de especial risco recolleranse nos plans de defensa. Neste eido, inclúense as actuacións que deben realizar os propietarios dos montes e os responsables das vías de comunicación e de calquera instalación situadas no contorno. No caso de gasolineiras, industrias pirotécnicas ou almacéns de materiais inflamables, os seus propietarios deberán manter limpa a vexetación nun perímetro de 50 metros.

Segundo establece o Decreto 21/2005 de prevención de lumes e regulamento dos aproveitamentos forestais, nas zonas de especial risco prohíbese a utilización do lume para eliminar restos de aproveitamentos forestais en calquera época do ano, agás xustificación técnica da inexistencia doutras alternativas.

Ademais, nestas áreas poderanse declarar perímetros de preferente ordenación para o pastoreo, para que esta actividade se desenvolva unicamente no interior de cercados. Prevese tamén a posibilidade de establecer axudas públicas para a elaboración de plans de aproveitamento gandeiro. Outra medida específica para estas áreas é o requirimento dunha autorización de Medio Ambiente para a realización de competicións de vehículos a motor.