Vieiros

Non hai moito que lles contabamos dos proxectos que no eido do control das comunicacións manexaban os gobernos europeos. O Reino Unido, Alemaña, Francia, Italia e España xa acordaran hai poucos meses avanzar no control das comunicacións telefónicas e internáuticas. Daquela a previsión era esixirlle ás operadoras que retiveses os datos cando menos durante un ano. Aproveitando as circunstancias especiais creadas logo do recente atentado o goberno Blair volve poñer na mesa a iniciativa e mesmo pide ampliar a cinco anos a retención dos datos.

A rede de vixiancia que compartirían os gobernos europeos permitiríalle ás autoridades policiais o acceso a todo tipo de comunicación telefónica e aos correos electrónicos que se intercambian os cidadáns. O ministro de Interior, Charles Clarke, precisou que non se accederá ao contido das mensaxes, senón simplemente aos rexistros da comunicación: os lugares dende onde se realiza, os números e o momento exacto. Clarke detallará as esixencias británicas na xuntanza de ministros de Interior e Xustiza que terá lugar en Bruxelas este mércores.