Vieiros

Durante a súa intervención no Consello Nacional do BNG, Quintana afirmou que, desde o "primeiro día" que se iniciaron as negociacións cos socialistas para a conformación do goberno, o BNG defendeu tres "capítulos prioritarios": a reforma do Estatuto, un programa entendido como un "contrato" cos cidadáns e a débeda histórica. "Esas son as cuestións que importan, que están abertas e nas que temos que chegar a acordos", e engadiu que a "forma e a organización" do próximo gobierno son secundarias. Por iso, indicou que o goberno bipartito terá que asumir a "firme vontade" de liderar unha reforma "ambiciosa" do Estatuto, e traballar sobre un calendario "preciso e exhaustivo" que os cidadáns poidan avaliar. Ademais, propuxo que se faga sen "exclusións".

Quintana quixo deixar claro ante os membros do Consello Nacional que, estar no goberno "dunha maneira ou doutra" ou "nun sitio ou noutro", non é unha prioridade para o BNG. "Estaremos ou non, estarei ou non, alí onde consideremos que servimos mellor aos obxectivos e compromisos do cambio galego. Na forma e no sitio que máis eficaz e eficiente sexa para os intereses do país e das galegas e galegos" engadiu ao subliñar que os gobernos non se fan para a "comodidade" dos gobernantes, senón para o "servizo e satisfacción" dos cidadáns. "Nin especulamos, nin releamos, nin xogamos a facer e desfacer gobernos nos medios" advertiu Quintana.