Vieiros

En teoría, as entrevistas televisadas son conversas entre un xornalista e un persoeiro. A ética aconsella que como moito se lle digan ao entrevistado cales serán os temas a tratar pero nunca revelarlle as preguntas e moito menos deixar que sexa el o que diga cales se lle deben facer. Isto foi o que ocorreu coa entrevista emitida onte á noite pola TVG con Manuel Fraga.

Obviamente estas manobras quedan detrás do pano televisivo e o que o espectador percibe é o resultado final. Un resultado final que aínda queda "máis directo" se o entrevistado tén a oportunidade de ler mensaxes redactadas coma se fose un locutor do telexornal. E é que en alomenos dúas ocasións, Manuel Fraga xirou a cabeza, mirou directamente á cámara e lanzou un speech perfectamente medido, cargado de datos e cifras.

Para poder facelo, a TVG puxo ao servizo do candidato do PP o chamado teleprompter, un aparello que permite ler un texto sen apartar a vista da cámara e, por estensión, mirándolle ao espectador directamente aos ollos.

Malia ter esta axuda, Fraga non puido evitar trabucarse nalgunhas palabras mentres a súa mirada percorría a pantalla de lectura, invisible para os que estaban sentados na casa.

Desta maneira o que en principio debía ser unha entrevista aséptica por parte do medio adquiriu por momentos tintes de ser un mitin encuberto. Máis aínda, o que debía ser un programa informativo chegou a se converter nun acto propagandístico fóra dos tempos asignados pola Xunta Electoral Central a cada partido e no que, aínda por riba, se manipulou ao espectador utilizando os recursos técnicos e humanos da TVG.

E todo a escasas horas de que comece oficialmente a xornada de reflexión.

Descarga da páxina de Hai que botalos! o vídeo da intervención de Fraga.