Vieiros

"Os acontecementos dos últimos anos pouco contribuíron á obtención de solucións mundiais ás guerras", advertiron os responsábeis do centro durante a presentación do informe. O estudio subliña tamén a existencia de moitos conflitos que escapan á atención da comunidade internacional malia a súa gravidade, casos de Nepal ou Uganda. O Instituto láiase do espectacular crecemento que experimenta a industria do armamento en todo o mundo, con varias delas acadando xa a dimensión de poderosas multinacionais hoxe en día.

Ao tempo, critican a falta de transparencia dos gobernos á hora de facilitar datos sobre as vendas comerciais de armas en todo o mundo, "só está dispoñíbel unha cantidade limitada de información ao respecto", advirten, agoirando unhas cifras reais do negocio das armas moito maiores que as que poden ser avaliadas estatisticamente. Contámoslles tamén, que o informe fai referencia á invasión de Iraq, subliñando que se lanzou "sen probas e con informacións inexactas".