Vieiros

Segundo o informe do Instituto Internacional de Investigación da Paz, en Estocolmo, os investimentos militares sumaron no 2003 o 2,7% do PIB mundial, 123 euros por habitante. Trátase de niveis de gasto en armas só acadados durante a guerra fría. Á beira, os propios datos do Banco Mundial ou do Fondo Monetario Internacional amosan incrementos neste apartado de ata o 18% no conxunto de Estados.

O billón de dólares que no último ano sumou o gasto militar en todo o mundo, multiplica por máis de dez veces as cantidades destinadas a axuda oficial ao desenvolvemento. Ademais, e malia ás promesas que abrollan nos discursos dos líderes políticos, os tímidos aumentos nas cantidades para a axuda, en equivalencia, quedan moi por baixo do compromiso das décadas anteriores. A galería de comparativas é habitual nas denuncias dos colectivos humanitarios.

Exemplos:
-o que no mundo se gasta en armas durante catro días chega para garantirlle a escolarización a 120 millóns de cativos.
-cos 75 mil millóns gastados nos primeiros meses da guerra de Iraq podería dárselle educación a toda a infancia e acceso a servizos sanitarios básicos a toda a poboación mundial