Vieiros

Nunha nota de prensa, a propia consellaría afirma que "a ausencia onte de responsábeis sindicais na Mesa Sectorial de Funcionarios e na Xuntanza do Comité Intercentros, onde se tiña previsto abordar a cuestión do aumento retributivo, evidencia unha desatención das súas funcións. Malia iso, a consellaría de Presidencia decidiu promover esta acordo, aprobado hoxe polo Consello da Xunta".

A CIG considera un "insulto" e un "desprezo ás reivindicacións dos empregados públicos" a aprobación por parte da Xunta deste aumento salarial.

Para o sindicato nacionalista, o Partido Popular "pretende acalar as mobilizacións do persoal funcionario e laboral cun incremento equivalente a 4 racións de empanada ao mes".

A CIG lembra que "onte, a protesta conxunta de todos os sindicatos xuntou en Compostela a mil delegados do persoal laboral e funcionario para pedir a recuperación do poder adquisitivo (10,4% nos últimos 10 anos) e medidas de defensa dos servizos públicos contra a privatización e a utilización partidista e clientelar das adxudicacións a dedo e a contratación de persoal". Para a CIG, a Xunta "impón unilateralmente un incremento retributivo que máis parece "caramelo electoral" que unha proposta seria e rigorosa de compensar os salarios máis baixos a nivel comparativo co resto das Administracións".

A CIG anunciou que "rexeita" este incremento salarial e que o sindicato está disposto a continuar coas mobilizacións previstas. A seguinte é o paro convocado para o vindeiro 1 de xuño.