Vieiros

Un numeroso grupo de traballadores contratados sumouse ao paro e foi recibido na concentración con aplausos dos seus compañeiros con contrato estábel. Nun comunicado, a dirección da CRTVG afirma que "a incidencia cuantitativa da folga no conxunto da CRTVG e as súas sociedades foi inferior ao 30 por cento" e "agradece o comportamento de todos os traballadores en xeral e dos encargados dos servicios mínimos en particular, valorando que todos os servizos esenciais funcionaron con plena normalidade". Para o Comité Interempresas, o paro tivo un seguimento de practicamente o 100% do persoal.

Nun comunicado, o Comité Interempresas afirma, fronte a versión da dirección da CRTVG, que "a programación se viu afectada por esta folga co atraso en dez minutos do Telexornal 1 e a supresión do programa "A Revista".

O Comité interempresas, formado polos sindicatos UGT, CC.OO., CIG e USO, lembra "que esta folga foi convocada despois de 11 meses de infructuosas negociacións coa Dirección da CRTVG. Os paros continuarán o vindeiro día 29 e ao longo de diferente xornadas no mes de xuño, incluída a xornada electoral do día 19".

Con estas xornadas de folga os sindicatos "pretenden denunciar a precariedade na contratación que se rexistra dende hai anos nas empresas que conforman a CRTVG, ante o que se pide a estabilización do emprego nas tres sociedades".