Vieiros

O prazo para presentar as proposicións para os concursos da TDT remata o día primeiro de xuño e a apertura dos sobres farase o día 17, é dicir, o venres anterior ás eleccións. Desta maneira, o goberno en funcións aínda terá un marxe de manobra dun mes para conceder as licenzas, xa que a a sesión de constitución do novo Parlamento será o 18 de xullo.

Os aspectos que se valorarán tanto nos concursos da TDT autonómica coma nos da local son practicamente os mesmos. A Xunta deseñou un baremo de ata 450 puntos distribuídos en tres capítulos de 150 puntos cada un: proposta técnica, proposta económica e programación. Sen embargo a proposta de emitir en galego o cen por cen da programación só valerá 30 puntos sobre o total. Ademáis, se unha proposta recolle o compromiso de emitir tan só o 51% obtería 29 puntos. É dicir, os concursantes obterán practicamente a mesma puntuación aínda que propoñan a metade de programación en galego.

A celeridade coa que a Xunta quere ter definido o novo panorama audiovisual galego choca coa normativa estatal que nestes momentos está en fase de tramitación pero que entrará en vigor en menos dun mes. Nela recóllese que as concesións serán por un periodo de dez anos para que os concesionarios poidan amortizar os investimentos, mentres que a normativa galega limita ese tempo a cinco anos no caso dos programas locais. O paquete de medidas de impulso da TDT do Estado tamén establece unha moratoria no prazo de resolución dos concursos, que pasa do 4 de agosto vixente ao 31 de decembro deste ano.

A publicación dos pregos dos concursos da TDT cadra coa decisión do Consello da Xunta de conceder tamén licenzas para a radio dixital. En total sairán a concurso 72 emisoras, seis de ámbito autonómico e 66 locais. Neste caso os concesionarios non poderán participar no capital de máis de dúas emisoras do mesmo ámbito de cobertura. Sen embargo si poderán facelo se o ámbito de cobertura dunha non supera o 20 por cento do da outra. É dicir, unha cadea podería ter unha emisora de ámbito autonómico e ao mesmo tempo outra de ámbito local. No tocante á lingua, o galego volve saír mal parado. Dun mínimo de 14 horas diarias de emisión os concesionarios só terán obriga de emitir en galego sete horas.