Vieiros

En plena precampaña electoral lanzada dende hai semanas, as enquisas electorais internas do PP semellan volver chimpar cara a seguridade da maioría absoluta. Nos últimos meses e dende a crise aberta coa rebelión ourensá, as avaliacións encargadas para consumo interno e filtradas aos medios en diversas ocasións chegaron a advertir á dirección dos populares galegos de perdas máximas posíbeis de ata seis asentos no Parlamento galego. A última sondaxe pública coñecida, a realizada por un equipo de investigación da Facultade de Ciencias Políticas da Universidade de Santiago, poñía ata dezaseis puntos por riba o apoio conxunto a nacionalistas e socialistas sobre a intención de voto rexistrada polos populares. Traducidas a escanos, esas porcentaxes daríanlle 34-35 escanos ao PP, 23-24 a PSOE e 17 a BNG.