Vieiros

O presidente do Consello Nacional do BNG, Xosé Manuel Beiras, demitiu deste cargo e abandona asemade a súa carreira por figurar nas listas electorais dos nacionalistas. Nunha carta enviada ao voceiro nacional Anxo Quintana, Beiras discrepa coa dirección da fronte no que respecta ás atribucións do seu cargo de presidente do Consello Nacional, e cualifica a polémica sobre as candidaturas de "detonante". Nos últimos días, as propostas de Beiras para a confección das listas electorais foran amplamente rexeitadas na maioría das asembleas comarcais do BNG onde foron votadas. Beiras recoñeceu que nos días previos ao Consello Nacional do pasado xoves cometera algúns "erros mediáticos", pero, como dí na carta, "é falso que no último Consello Nacional eu teña asumido as acusacións das que fora obxecto por parte da Comisión Executiva". Precisamente, a propia Executiva do BNG, reunida logo de coñecer o anuncio de Beiras, "lamentou" nun comunicado a demisión do presidente do Consello Nacional, ao tempo que mostrou "respecto" pola súa decisión.