Vieiros

"Xa teño dito que non fago acordos coa cúpula", subliñou Xosé Manuel Beiras, preguntado pola posibilidade de aceptar un segundo posto nalgunha das candidaturas provinciais, "quero que a militancia se exprese". "A miña toma de decisións dependerá do resto das candidaturas", explicou, "e non quero que a militancia se entere nos medios do que debe coñecer nos documentos".

Non quixo adiantar máis Beiras sobre a súa postura fronte a este debate interno do Bloque, remitíndose a unha opinión que xa lle tería sido manifestada polo miúdo á executiva da formación en novembro pasado. Así, renunciou a facer novas valoracións ata coñecer as listas completas dicindo non agardar "o límite de que ese conxunto de persoas non sexa aceptábel".

Mantén a súa candidatura
A proposta de cabeza de lista electorais presentada pola dirección do BNG non contou co apoio unánime da Executiva. Durante a xuntanza da tarde do luns, que durou máis de 4 horas, 11 membros votaron a favor da proposta da dirección, pero houbo tres abstencións: a de Xosé Manuel Beiras, a de Encarna Otero e a de Tareixa Novo. Amais, segundo Europa Press, Beiras presentou un voto particular e mantivo a súa candidatura como número un pola Coruña ou por Pontevedra. Desta forma, Beiras translada a súa proposta ao debate nas asembleas comarcais, que se convocarán a partir desta semana.

Na xuntanza da Executiva, Beiras criticou que a dirección do BNG presentase as listas electorais en dúas fases, primeiro os cabeza de lista máis o segundo posto pola Coruña e, antes das vacacións de verán, as candidaturas completas. Semella que Beiras, antes de ceder no pulso que mantén con Quintana, quere coñecer a composición definitiva das listas e non se conforma co anuncio dos primeiros postos. Porén, a dirección do BNG lembrou a través dun comunicado que foi o Consello nacional quen decidiu que as listas do BNG se eleborasen en dúas fases: "Non foi unha decisión gratuíta, con ela, a dirección nacionalista quería que a sociedade galega visualice, precisamente, o primeiro treito das candidaturas, a aposta do nacionalismo galego pola renovación e o cambio".

O propio Quintana reclamoulle a Beiras o seu apoio para a "renovación e modernización" do nacionalismo: "pídolle que me axude e que decida en que posto e por que circunscrición quere ser candidato", apuntou. Porén, semella que Beiras prefire que o debate sobre a súa candidatura a encabezar unha lista continúe vivo nas asembleas comarcais. Quintana, con todo, destcou que o BNG entende a renovación como un exercicio de "sumar e non de restar". Por iso, eloxiou o traballo desempeñado polos dirixentes nacionalistas que ocuparon as primeiras posicións no anterior proceso electoral: "continúan sendo activos importantantísimos para o nacionalismo galego e continuarán achegando toda a súa valía desde outros postos de responsabilidade".