Vieiros

"Unha muller nova, que se incorpora ao mercado laboral nos sectores de hostelaría, servizos ou téxtil, que ten un contrato a tempo parcial pero fai xornada completa sen cobrala". Este é o retrato robot do traballador en precario en Galiza, segundo a análise da CIG. Co título Precariedade e sobreexplotación da forza de traballo nos sectores en Galiza, o informe foi explicado este martes en rolda de prensa por Antolín Alcántara, secretario confederal de negociación colectiva. Alcántara subliñou que a situación é consecuencia "das sucesivas reformas laborais, que nun período de 20 anos foron provocando a perda progresiva de dereitos adquiridos polos traballadores".

Ao fío, o secretario xeral da CIG, Suso Seixo, lembrou que a negociación colectiva debe facerse en Galiza e atendendo ás "necesidades reais" dos traballadores galegos , e nese sentido, expresou o rexeitamento dende a Confederación Intersindical Galega ao acordo interconfederal que asinaron os sindicatos CCOO e UXT coa Confederación Española de Organizacións Empresariais. "Repiten o esquema dos pactos acadados en anos anteriores, que demostraron na práctica que eran negativos para os traballadores e que lonxe de mellorar a súa situación laboral favoreceron os recurtes salariais e un incremento da precariedade", laiouse Seixo. Ao respecto, a CIG anuncia que a súa proposta para a negociación colectiva do ano 2005 baséase na suba de 42 euros por mes para os salarios e na loita polo establecemento de porcentaxes máximas de eventualidade en función de sectores e empresas.