Vieiros

A emigración: tendencia á alza
Galiza ten un dos saldos máis negativos do Estado entre a porcentaxe de traballadores que emigran a outras comunidades para empregarse e os que veñen de fóra. Segundo o informe do INEM, durante o ano pasado, os galegos asinaron 65.673 contratos para un posto de traballo noutro lugar do estado, fronte aos 37.673 formalizados aquí por persoas doutra comunidade. Se comparamos estes datos cos de 2002, comprobamos que a procura traballo fóra de Galiza está en aumento. Así, en 2002 asináronse 56.327 contratos, un 16,5% menos cos asinados en 2004. Os datos do IGE confirman esta tendencia. De feito, os índices migratorios incrementáronse desde o ano 2000, representando o 45,8 % do total da década (anos 1992-2003). Se en 1992 emigraron 7.916 galegos, en 2003 fixérono 22.548.

Os novos emigrantes: mozos e da costa
O fluxo migratorio que se produciu na última década presenta significativas novidades respecto á emigración tradiciconal. A procedencia dos galegos que emigran é maioritariamente das provincias de A Coruña, 40,8% (60.408) e de Pontevedra, 33,2% (49.159), o que vén representar entre as dúas, o 74% do total de emigrantes galegos a outras comunidades autónomas no período 1992-2003. De feito, o representante da CIG, Manuel Mera sinala que "esta é a primeira vez que se dá un proceso migratorio no que a procedencia das persoas que marchan á busca de alternativas laborais é maior das zonas costeiras que do interior, de comarcas como Ferrolterra, Barbanza, Costa da Morte, Morrazo, Bergantiños".

O que emigra, recunca
Ademais, en moitos casos, as persoas que emigran non o fan por primeira vez, o que dá idea, segundo a CIG, de que regresaron a Galiza para intentar atopar alternativas laborais e ante a ausencia destas optaron por emigrar de novo a outra comunidade autónoma. Tanto é así que a cifra dos que emigraron por segunda vez ou superior (86.742 persoas entre 1992-2003) é maior á dos que emigraron por vez primeira (71.094 persoas no meso período).