Vieiros

A maioría dos bispos españois decidiu dar un golpe de temón no rumbo da Conferencia Episcopal e elixiu a Ricardo Blázquez, bispo de Bilbo, como novo presidente do máximo órgano xerárquico da igrexa romana no estado español. O vilalbés Antonio María Rouco Varela, que aspiraba a ser reelixido por terceira vez para o cargo, non contou co apoio necesario dos dous terzos do epicopado. Blázquez, que é bispo de Bilbo desde 1995, puido contar co apoio da maioría dos bispos vascos e cataláns, desconformes coa liña centralista de Rouco, e cos sectores do episcopado máis favorábeis ao diálogo co actual goberno socialista. Blázquez estivo como bispo auxiliar da diocese de Santiago, precisamente con Rouco Varela, entre os anos 1988 e 1992. No ano 2002 posicionouse en contra da Lei de partidos e da ilegalización de Batasuna o que provocou un novo enfrontamento entre a igrexa vasca e o PP.