Un plan de emerxencia social que atenda ás necesidades urxentes dos uruguaios, segundo as estatísticas a cuarta parte da poboación vive na pobreza, será prioridade na axenda de Tabaré Vázquez, que este martes accede á presidencia do país. A Fronte Ampla liderada por Vázquez, ten a maioría parlamentaria logo de conseguir o 50,45% dos votos nas eleccións de outubro pasado. É a primeira ocasión nos máis de 170 anos de historia de Uruguai en que a esquerda gobernará o país. O propio Vázquez xa facilitara o cambio ao acadar a comezos dos 90 a alcaldía da capital, Montevideo.