Vieiros

Os representantes do PSOE na Mesa do Congreso dos Deputados anunciaron que votarán a favor da tramitación parlamentaria do Plan Ibarretxe, aprobado pola cámara vasca. Esta decisión supón que a proposta de Novo Estatuto para Euscadi do goberno vasco será debatida nas Cortes españolas, a pesar de que o PP votará en contra de que o plan entre no Congreso. O secretario xeral do PSOE no Congreso, Diego López Garrido, argumentou que a Mesa non é un Tribunal Constitucional que examina o contido da proposta, senón que a súa función é examinar se cumpre o procedimento. A Mesa do Congreso está integrada por 9 membros: 4 do PP, 3 do PSOE, 1 de IU e 1 de CiU. Probabelmente, só o PP votará en contra da tramitación parlamentaria do plan.